الجمعة، 14 أكتوبر، 2011

رقص علي الاربع ..**


لم يدر في خلدي يوما ان الرقص باي حال او شكل سيكتب عنه سطرا واحدا ولا فكرت في ذلك حتي شاهدت ما يسمي الرقص التعبيري

وفقراته تقوم بها مجموعه من منتسبي الجنس البشري من الذكور ممن سقطت الشوارب علي وجوههم سهوا

ومعهم مجموعه اناث تقديرهن : نساء
 
وقد نفشن شعورهن وكانهن
من ساحرات القرون الوسطي في اوروبا << ( علي ذمه الروايات )..

يترنحون علي خشبه المسرح ياخذونه ذهابا وجيئة وكانهم يبحثون عن شيئ ينظرون الي بعضهم شزرا ثم يتهاوون
 
 واحدا تلو الاخر ويرجمون الارض بانفسهم ثم يكملون الرقصه علي قوائمهم الاربع او الثلاث ان تطلب الامر

هذه الحركات الاستعراضيه الاستهباليه والتي تسمي رقص لم تكن محط اهتمام
 
 الكثيرين من الناس ولا حتي بعض اهل الفن انفسهم ..

حتي خرج علينا احد فقهاء الفن واحد اعمدته وحيطانه ليزكي هذه التفاهات ويهرطق
 
 علينا بانها رساله يعبر فيها
 
 الراقص عن مشاعره وانفعالاته لقناعه في نفسه بانها الطريقه المثلي لتفريغ الشحنات
السالبه والموجبه لغضب الله

يا وحيد عصرك وفلتة زمانك اذا كانت انفعالات مكبوته لماذا لا يخرجها هؤلاء
 
 ( المجانين في العيادات النفسيه )
 
وكافي علينا الفنون من الفن الاول الي الفن السابع !!


هذا الفن الذي اخذ براءه اختراعه سكان الغابه

اصبح له مصطلحات ومفاهيم واصول وخذوا بالكم من كلمه اصول.. حاله كحال اي علم اخر..

ومن باب ( دع غيرك من مواهبك يتعلم ) سيصبح له مقرات ومراكز
تشد الرحال اليها !!!!!!



واضاف ذلك الفقيه لا فض فوه "
ان هذا الرقص افضل من غيره باعتباره رياضه نفسيه وبدنيه ولو تعلمناه
واتقناه فاننا حتما واكيد سنتقدم به.
 
...
هناك من خالف العادات الاجتماعيه والدينيه والتي تجردت من لباس الشرع والعقل والفطره واصبح الرقص علي الاربع والانسداح والانبطاح فن.. وعاش الفنانون ذخرا للبلاد وسحل العباد علي خشبه المسرح ..

السبت، 17 سبتمبر، 2011

الضبعة

الضبعة ..

عا رفين لما تجتمع وقاحه مصحوبة بخبث متوارث من ناحيه ..  مع تخلف وجهل مستمد من مصادره الخاصه من ناحيه ثانيه

لما تقترب  الحالتين من بعضها .. وتتصادم ......

يتبلور ساعتها احساس بالفرح  .. وقهر وحزن  وهموم  .. لكن .... هم يضحك وهم يبكي ..

هذي المشاعر الي حسيت فيها وانا فقط مستمعه لسالفه صارت ونقلتها لي اختي

السالفه سلمكم الله .... عجوز بنت حلال  ..  تكاد تكون علي الفطرة  .. ساكنة مع عيالها

لها جيران اغلبهم  محترمين وطيبين  ...  ظنت  من عشرتها معاهم وحبهم لها ان الغابه دائما خاليه من الضباع

طبعا الضبعه الي ساكنه قريب منها واهي جاره لها ...  لكن مو من فئه المحترمين ولا حتي الي كافين خيرهم وشرهم

ضبعه شكلها غريب ...بعد اول نظره لها ..  يقف  الناظر دقيقة حداد علي الجمال .. مشعرة  كأنها جامعه شعر حريم الكويت كلهم

الي شوفها من بعيد  يقول ام صالح بمسرحيه بيت بو صالح .. لما كانت لابسة ثوبها البني في الفصل الثاني

هذي الضبعة  .. كانت تزور العجوز بحكم الجيرة .. وتسلم وتسال عن القريب والبعيد .. وبعدين تجيلها ايم تختفي ومحد يشوفها

واعتقد انها تتعمد هالشي علشان العجوز تسألها عن سبب غيابها ..وهذا الي حصل كل ما غابت فترة وردت تزور العجوز

سالتها العجوز عن سبب غيابها ..وان شاء الله ما فيها شي  .. طبعا الضبعه  كانت ترد بكل هدوء وبابتسامه مرسومة حلوة وتقول :

والله زيارتج يا ام فلان ما تتفوت .. بس حسبي الله علي معاوية بن ابي سفيان هو الي ملهيني عنج .."

في البدايه كانت تقط  كلمتها واهي تبتسم ..وبعدين صارت تقطها وتتبعها بضحكه رنانة ..علي شكل العجوز واهي ضايعه بفكرها

والعجوز المسكينه ما تدري شالسالفه .. واعتقد ما سمعت بحياتها باسم معاويه .. فتحسبن عليه اهي الثانيه

وهذا دوبها كل مرة تزور العجوز فيها ..حتي بنات العجوز ما انتبهوا او حتي سألوا عن هالاسم الغريب .. والمشكله ان حتي

لما عرفوا بعدين الاسم ونيه جارتهم الخبيثه .. ما فيهم الي تحركت وردت الصاع صاع مثله ..الا صارت وحده من بناتها تسولف

بالسالفه لرفيجاتها بالدوام " وتضحك " كانها قايله نكته ..

للاسف وضعنا بهالبلد اصبح مريب ..وصرنا مطيه سهله .. صرنا ننشتم ببيوتنا ..وما نرد لجهل الغالبيه العضمي

منا بدينا وبرموزنا الاسلاميه ..















الثلاثاء، 30 أغسطس، 2011

اما كليه التربيه الاساسيه ... او قبر يحتويها ..!!!!

قريت خبر عن حصول تقريبا 340 طالب وطالبه كويتيين لبعثات داخليه في كليات الخليج للعلوم والتكنلوجيا وجامعه الشرق الاوسط
الامريكيه والجامعه الامريكيه في الكويت وكليه القانون الكويتيه العالميه ...وتم نشر اسمائهم بالجرايد
احد الاشخاص الي تتبع الاسماء ..لاحظ ان لا وجود  لاسماء طلبه من ابناء القبائل او بالكاد اعدادهم لا تتجاوز اصابع الكف 
وعلق علي ان ليس هناك تفسير لقبول اسماء وعوائل معينه واستثناء ابناء القبائل الا العنصريه ..البغيضه ..واحتقار ابناء القبائل

/
 علي ما اشوف واسمع .. كلامه وتفسيره للخبر صحيح ولا شي غير العنصريه .. والاستخفاف بجانب اساسي من مكونات الشعب
قبل لا الوم اي شخص يتجاهلني لازم اراجع نفسي ..
 بصراحه انا طرت علي بالي اسباب كثيرة لهذا التجاهل ..
  للاسف لما فسرت اغلب الاسباب  لقيت القبليين نابعين من  نص الحلقه ..
 باتشعب  بالموضوع وامسك بعض التصرفات الي اعتقد انها اهي الي ترجع القبيلي للورا بعكس الواقع الي يتطلب منه السير الامام
/

راح اخذ الموضوع من بدايته علشان تتضح الصورة اكثر واغوص في  مجاهيل نفس  الانسان القبيلي والي يمثل
 الشريحه الاساسيه والكبيرة من الشعب الكويتي والي  موجودين من  عهد تاسيس الكويت ..
 عاصروا مراحل تطور الكويت  من الالف........................... لكن ما وصلوا الي الياء للاسف

/
/
للاسف الوصول الي الياء  ..  يتطلب من القبلي " جرأة  ومواجهه " ..مواجهه منو ؟؟ الجسم الثابت طبعا وهي العادات
العادات والتقاليد...(.اعتقد انها  البند الثاني بعد الشهادتين بالنسبه للقبلي) .. جات  اجيال وراحت اجيال ..
وهي صامدة محد  يجرأ   انه  يدخل علي موادها اي تعديل .... من الاخر ... صارت من قوانين الطبيعه ..!!


متمسكين بهالعادات بايدينهم واسنانهم .. ويتابعون الحياة من حواليهم بتوجس غريب وخوف .. مو قادرين يماشون مجتمعهم  بطمأنينه
لا والادهي من هذا كله .. يبون المجتمع يجيهم لحد عندهم  بحجه العادات ..
 وانهم  مو مثل غيرهم  بلا كرامه من فئه " السباحين المهرة " اهل المهن الوضيعه الي دخلوا الكويت  وكانوا يمسحون  الجوخ ..
 ويقلقسون تحت هذا الشيخ وهذاك التاجر  الي ان حاشوا نص الكويت لهم ..!!
طيب احنا معاكم بحفاظكم علي كرامتكم وهيبتكم ..لكن حطوا في بالكم ان هالكرامه والاعتداد الزايد بالنفس
بدون عمل وسعي يسحب البساط من تحتكم ..وفاقد الكرامه قدر بوقت قياسي بسبب تفكيره المنطقي المتباري مع مجريات البلد
ان يلغي وجودكم العملي ..مستفيد من القيود الي ربطتوا انفسكم فيها ..



اشياء كثيرة اشوفها وتفسيرها موجود عندي .. يخليني اسال دايما اذا مو قادرين علي هالنمط من الحياة ليش مستمرين فيها ؟؟
ليش ما ترجعون مثل ما كنتوا .. ولا هو شي صعب ..
 المنطق المعمول فيه في كل دول العالم .. يقول يا اما تجارون الحياة مثل ما اهي
 او تتركونها لحياة انتوا قادرين عليها وتريحون انفسكم .
.وتريحون هالبلد من عبالة تعليمكم علي الاقل .. يعني مستحيل اي بلد ثاني يتعب علي مواطنيه خصوصا بالتعليم الي تقوم عليه
مقومات حضارة اي بلد .. وبالتالي ما يلقي اي نتيجه يستفيد منها في نهضته ..
/
/
كل ما دخلت مؤسسه حكوميه لقيت هالموظفات اغلبهم  من بنات الصناع ...او الحضر  ..
واذا فيه قبليين فهم شباب " وبس .....انزين وين البنات ؟؟ طبعا القبيليه هنيه اما مدرسه او تدرس بمعهد سكرتاريه
سمحتوا للبنت انها تدخل ميادين العمل .. ليش الانتقائيه هنيه .. ؟؟ممكن اعرف ؟؟ كل هذا بحجه الكابوس الي اسمه الاختلاط 
طيب يا شباب القبائل .... 
 اذا مو عاجبكم الاختلاط  وحاطينه حجه لمنع البنت من بعض الوظايف ..
 ليش تشتغلون بوظايف فيها اختلاط  وتحتكون ببنات الناس ..؟؟

 لو فيه وحده من بناتكم لها طموح طب او هندسه
او قانون .. مع هالعادات المصيبة  .. بتفضل تقعد بالبيت .. ولا انها تدرس في مجال ما تحبه .. او تضطر تدخل كليه التربيه الاساسيه
وتطلع مدرسه ..اقسام شؤون الطلبه في المدارس تغص بموظفات اغلبهم يتسدحون علي المكاتب من قل الشغل
بنت من البدايه مرسومه لها خطتها التعليميه المستقبليه .. لو عصت وما رضت بهالخطه "......................" لا تعليق
 او قصرت الشر  واستسلمت .. تعتقدون  شنو بيكون وضعها ساعتها ؟؟
طبعا ما راح يكون عندها الا المشط والمرايه .. و الاسواق مثل ما نشوف ..او الاعراس والعزايم .." هذي الاخيرة  كثروا منها " ..
خلوها انسانه خاويه من اي طموح وابداع .. لا يمكن نستفيد منها باي شي ..حتي قضايانا ممنوع انها تشارك فيها
ما نسيت ندوة العضو محمد هايف .. الي سواها بعد الاحداث الي صارت بالبحرين والي نقلتها قنوات فضائيه ..
كنت واثقه  ان في مكان للنساء بالندوة .. وكنت مستعده للمشاركه مع خواتي وبعض صديقاتي  ولو من بعيد .
.تفاجات مذهولة ان ما فيه مكان للحريم ولا حتي الاطفال ..قضية  مصيريه مثل هالقضيه بالذات ..ليش ما تحشرون الحريم فيها
والله لو طلبت الحرمه من زوجها او اخوها يوديها للسوق او صاله عرس والله ما يتاخر .. طبعا عند توافه الامور زاهبين
اما انهم يعطونها حقها في ابداء رايها باي قضيه فهذي " فضيحة " .. طبعا ممكن يحلها اي احد ويقول ممكن المراه تتابع القضيه
اوالندوة واهي ببيتها ..وانا اقول اي ممكن ..بس وين  المشكله  لو حضرت بنفسها للندوة .. الحضور الجماهيري مطلوب رجال
ونساء والاهم الاطفال ..واهنيه اسمحلولي ابدي اعجابي بحضور وجدارة  المراه اليمنيه في احداث اليمن ..
 بهرني منظر الاحتشام من حجاب  .. ونقاب .. ولسان طلق .. يترك انطباع جميل عند المشاهد عن نوعيه العادات
المعمول فيها باليمن والي تفرض علي المراة عندهم الاحتشام " والي علي اساسه تقدر تشارك بقضايا بلدها ..





وحده من قريباتي بالثانويه جابت 92% علمي .. وهدفها تدخل هندسه ..طبعا صرفت النظر عن الجامعه كلها لان ابوها مو عاجبه
الاختلاط .( علي فكرة  ابوها مو متدين ) ...... !!! 
يعني معقوله  .. نخسر كفاءة مثل هذي علشان ....اختلاط  !!
الي متي وا حنا معتمدين علي الوافدين  رجال ونساء   بهذي التخصصات وغيرها من التخصصات المحضورة علينا ..؟؟
في مصر نسبه المتدينين كثر وبعضهم سلف و بناتهم متدينات واغلبهم منقبات ما سمعنا انهم منعوا بناتهم من الجامعات بحجه الاختلاط .. 
البنت بتختلط يعني بتختلط ..هذا واقع العاقل فيكم بيستوعبه .. اما الجاهل فالمكابرة عنوانه وما فيه داعي لاحاديه الهوي ..
علي الاقل البنت بتطلع لك بفايده في النهايه وبتخدم بلدها ودينها وبترتقي بمستواها التعليمي..

الفنون الجميله .. رسم تشكيلي ..تصوير ..تخصصات  ما لكم فيها ناقه ولا جمل ولا خروف .. مع ان في ناس اعرفهم يحبون الرسم
وشطار فيه .. لكن ان ينمون هالهوايات .. او يطلعون بمعرض ولو متواضع  ..
 مستحيييييل وعلي علي بالهم لانهم مو اصحاب مهارات ..
 ابناء القبائل الي درسوا تخصصات رفيعه المستوي .. قله  قليله متدارين بالشقوق واغلبهم رجال يعني المساله عندنا ما صارت ظاهره
المكان الوحيد بالكويت الي اصبح محتكر لبنات القبائل هي كليه التربيه الاساسيه ..
 والي  اصبحت مصدر الهام للقبيلي بعد اطمئنانه علي بناته فيها 
بل واضحت  من المقدسات عنده علي اعتبار انها اهون الشرور كلها ........

وكأني بالمقولة الخالده تنثر نثرا .. بعد تعديلها بقول احدهم :

المرة  ..... اما رجل يضمها ... ولا كليه تربيه اساسيه تدرس فيها ..... ولا قبر يحتويها  ........... وسلامتكم ..!!!




















السبت، 27 أغسطس، 2011

يا... بنات العز ..!!

بعد رحلة طويلة وممتعه .. ومناظر جميله مبهره ..
بجزر هاواي والي زرتها اكثر من مرة بس بالاحلام 

 قضيت حلمي الاخير بزيارتها علي مقعد الانتظار في احد البنوك

 سارحه بتفكيري بدون عقال ولا اي حد

فجاة  ....

انقطعت رحلتي علي صوت حريم يتهاوشون علي اولويه انجاز المعامله لان ما  كان فيه ارقام
 الي حاصل عندنا بالكويت ان الارقام  بارك الله فيها وان كانت جماد ..

هي الي تنظمنا بسبب نقص هرمون النظام عندنا..

انا هنيه ما اتكلم عن الرجال وان كان  بعضهم في فوضويه بالتعامل ..

 لكن انا اقصد الحريم عندنا ... واااااااااي يا الحريم

في داخلي ميه كلمه.. والف جمله ..

عن دفاشه بعض الكويتيات اذا مو اغلبهم  في التعامل مع بعضهم ومع غيرهم

وانا اقول الكويتيات ..

 من شيخه وموزة ورقيه .. مرورا بمعصومه وخيريه وزينب
وصولا الي موضي ونورة ومزنة ..

النظريه السكسونيه المتطورة .. 

تقول  ان المستوي المادي والمعنوي اذا بلغ مستويات عاليه

 فانه يهذب صاحبه ويضفي عليه تلقائيا مع مرور الوقت هاله من الرقي والشفافيه في التعامل مع الناس ..

صدقوني  هذي نظريه ثبتت من ايام الدينصورات  المنقرضه ..

كان اذا حلت عليهم سنه مطيرة وكثر العشب وسمنت الحيوانات
اكتشفوا ان الدينصورات في هذي المرحله تصير اكثر هدوءا .. وتقل حركتها ..ولا تتقاتل في الغالب

اما عندنا بالكويت .. فاجاركم الله .. البدائيه من الالف الي الهاء المربوطه  ..

 هي نتاج الثروه والرفاهيه..!!!

لو دخلوا بعض حريمنا  ..  لاي مؤسسه او  دائره حكوميه او حتي بقالة ..

الانتظار مختفي من جدولها ..

 علي بالهم الناس ناطرينهم يقصون الشريط ...

صرت اكره اي مكان فيه حريم وما فيه جدول ارقام ..

 واترقب الانفجار الكوني الي بيصير 
 لما وزعوا 200 دينار علي كل مواطن كويتي ..

 رحت حالي كحال اي مواطن معصور ماديا اركض علشان 
اتمتع بسحب هالـ20 دينار ..

طبعا كان فيه شباكين  سحب .. شباك  رجال وشباك  حريم 

شتتوقعون المشهد ؟؟مشهد حسيت فيه بالاستياء المشوب بالقرف ..

 اعتقد بدون مبالغه لو شكسبير شاف الي شفته جان كتبله  سيناريو

شباك  الرجال الي واقفين عليه كانهم مشفقين عليه ..او مغصوبين يسحبون منه .. 

واحد واحد واقفين ورا بعضهم

اما شباك الحريم  فالدوري كان ابتدي بينهم علي احراز المركز الاول 

 كانوا ثلاث ثلاث جنب بعض وحده تسحب وثنتين يمها علي الصوبين منحنين عليها وكأنهم منكبين  علي مطبق زبيدي .

.ولا شايفين هالمتطفلات في تصرفهم اي دفاشه ..

 اما الي فيهم بعيده وتنطر دورها ... فالهواء الي تنفخه في العمليه الشهيرة "

الزفير" ..لانها تكرمت وصفت بالدور يكفي لاطفاء برميل نفط محترق .. ..

المشهد هذا يتكرر في اغلب الاماكن الي ادخلها للاسف ..

لدرجه صار هالتصرف من سمات  المراه الكويتيه ..ولا عزاء للذربه فيهم  

كنت مرة مسافره لاداء العمره ودخلت اسواق بن داوود الي في ابراج مكه

واهي  سوبر ماركت ..طبعا كانت زحمه مثل العاده .

.والكاشيريه كل واحد جدامه اقله 7 من الزباين بيحاسبون اغراضهم

واهم من جميع الجنسيات .. طبعا انا وبنتي صفينا ننطر دورنا ..

ولا هذيج الحرمه الي اخترقت الصفوف ولا الفاتحين

وحطت اغراضها بتحاسب ولا سألت بالي واقفين قبلها ..

اهي معطيتنا ظهرها ما شفت شكلها بس لابسه عبايه راس ..انا تضايقت لاني واقفه

من مده طويله .. وهذي من الباب للمحراب ..

وهنيه شكيت بالامر وتولدت عندي الحاسه الشارلكهلموزيه

شميت ريحه تنبع من منظر  دفاشه متعوده اشوفها دايما ..

ريحه هربانه منها وهم لاحقتني هنيه ......... اهاااااااااااااا

  قلت حق بنتي اذا ما كانت كويتيه لج الي تبين ..

وفعلا لما دارت وجهها علينا طلعت بلدياتنا ..

 انا تفشلت من تصرفها خصوصا وان فيه خليجيين بين الي واقفين وشكل الكويتيين

واضح شباب وحريم  ...وأهي وجهها صبه ولا سائله بالعالم الي وراها ..


مصيبتنا يا الكويتيين الثانيه  بعد خسارتنا في معركه الصريف

 اهي مصيبتنا في حريمنا الي يعتبرون الدفاشه بكل اشكالها

" شطارة " وذكاء .. والمصيبه الاكبر حجما من الاولي ان لو احد كلمهم وعاب عليهم

تصرفاتهم يستنكرون ويقلبون ظهر المجن

لانهم مثل ما يقلون دائما  المقوله الخالده : احنا بنات عز شايفين خير 

طيب انا بقذفكم يا بنات العز بسؤال استنكارررري يضخم علامه الاستفهام:-

 اذا الهلاقه  اهي نتاج العز والرفاهيه

طيب لو كنتوا فقرانين وطايح حظكم ..

كان  كم وحده بتوقف يم الي تسحب من شباك السحب  ............؟؟












الاثنين، 22 أغسطس، 2011

يا للهول .. امي بالتلفزيون ؟؟

السلام عليكم ,,

من فتره وانا اتصفح جريده " بايته " يعني مو بايته من زمان مالت يومين مضت قريت خبر بالصوره

وأهو تكريم الام المثاليه بالكويت والي كل سنه يسوونه ويكرمون وحده من الامهات المكافحات

من أجل تربيه عيالها ووو..الي اخر الاوصاف

هذا التكريم السنوي للاسف ما تتكرم فيه الا نساء  نوعيه  واحده من فئات الشعب واهي الفئه الظاهره " هذا الي انا شفته "

وكنت أسأل نفسي ليش ؟؟ ماكو امهات صالحات مثاليات غير بهالفئه ؟؟

وين راحوا امهات فئه الاكثريه بالكويت ؟؟

وأقصد نساء القبائل ..

اعلم علم اليقين ان الفئويه واحيانا العنصريه لا بد وان تحشر في كل شي مو عندنا بالكويت بس الا في بلدان كثيره بعد

لكن انا هنيه ما راح  احط اللوم علي القائمين علي هالمسابقه  وما راح  اقصفهم بضمائرهم

وراح اوجه طلقات مدفعي لشباب الاكثريه  رجال ونساء  بالكويت ..

لما تشوفون تكريم هالامهات ما تتذكرون امهاتكم ... وتضحياتهم وسهرهم ومحاتاهم عليكم .. ما فيكم الي قال او قالت

امي ... حقها تتكرم جدام الدنيا كلها مو بس بالكويت .. الاكيد انكم عارفين هالشي وحاسين فيه

طيب وينكم ما تتحركون وتطالبون بحق بسيط من حقوق امهاتكم واهو انها تتكرم علني ويتشرف فيها عيالها واحفادها

طبعا في ناس بيرموني  في قالب التفاهه وكأني اسمعهم يقولون الله يغنيها عن تكريمهم ..!!

جزاهم علي الله مهما سوينا ما راح نرد جمايلهم علينا

لو كان هذا الي في نواياكم كنت بسكت واغض الطرف .. لكن الحقيقه  انتوا  ما تبون صور امهاتكم تطلع بالجرايد او يطلع عنها

تقرير ببرنامج مساء الخير .ويقولون ام فلان طالعه بالتلفزيون "يا للهول علي قوله يوسف وهبي ......

وكأنها لا سمح الله طالعه تغني او ترقص .. امهاتنا ينحرمون من لحضات فرح وسرور يتذكرونها  باقي عمرهم...

بسبب التفكير السلبي لبعض الناس .. اعتقد ان هذي السلبيه والجهل المركب اهي الي خلت القائين علي هالنوع من المسابقات

يتجاهلون حق امهاتنا بالتكريم حالهم كحال اي ام كويتيه .. ربت وتعبت واخرجت جيل مكافح قامت علي سواعده  نهضه الكويت

شنو الي يخليهم يدورون ويسألون ويختارون ام  في الاخر عيالها بيعارضون ظهورها العلني في وسائل الاعلام ؟؟

طبعا كلامي هذا ما اعمم فيه علي كل ابناء القبائل..

 التعميم لغه الحمقي ..في ناس متفهمين طبيعه الحياه ومعطين العادات اجازه طويله ..وعايشين حياتهم كيفما اتفق بلا اي تعقيدات ..










شد .. تان .. حشوات ..نحت ..تغيير للبنيه التحتيه

صباحكم ورد
 
كتبت من سنوات موضوع في احد المنتديات عن "المتلوكين والمتلوكات " اقصد اللوك
والي صرنا نشوفهم بكثره خصوصا بالاعراس والعزايم وللاسف بسببهم انهضمت حقوق المولودات بمشيمه جميله
وصار ضروري ان نؤمن ان العدل بالظلم واجب
تذكرت هذا الموضوع لاني انقطعت عن الاعراس فترة واضطريت ارجع لمشاركه احدي قريباتي فرحتها
اترككم مع الموضوع :


تخيلوا معاي ...
خلال 24 ساعه .... البوصه تصير عروسه
هذا ايميل وصلني بس للاسف لغيته بدون ما ادري
فيه صور 8 حريم باشكالهم العاديه .. بدون مكياج ...

وخلال 24 ساعه .. لبسوهم ومكيجوهم " وشدوهم " وصاروا في الاتجاه الاخر
الي يشوفهم يقول في مسابقات الجمال
وكل وحده حطوا صورتها الجديده تحت صورتها القديمه !!
والله ما عرفتهم .. باللوك الجديد .. غيروهم 360 درجه .. وصرت ادقق بالصور
اني القي ملمح يثبت انها صاحبه الصوره الي فوق .. ما في الا النظره او الابتسامه

بصراحه اصبح شي مقرف يدعو ويبعث علي " ... " ما ادري شقول الكلمه
مو لاقيتها ..............
خبرتي بآخر ما توصل اليه خبراء الشد والنحت بالتجميل بالكاد معدومه
لاني لي الحين استخدم " ادوات النصب " القديمه ..
كحل وحمره وماسكرا .. اضمن من وراها لقب " متبرجه " باعتدال
لكن في تجوالي بالاسواق كنت اشوف اشياء في محلات ملابس السهره النسائيه
وهي قطع تخيط مع فستان السهره .. لتكبير الصدر والارداف ..
وكروسيه قوي لشد الخصر ... !!!!

ولما قلت لاختي عن هالاشياء .. ضحكت علي وقالتلي عن قصه وحده صديقتها
واسمحولي ادخلكم شويه في منظومه " كيدهن عظيم "
صديقه اختي هذي جسمها رشيق نعم بس يميل للنحف يعني كانها " مسطره "
لا قدامها ولا وراها ..
وزوجها دايما يعايرها بزوجه اخوه الي معاهم في البيت والمليانه حبتين
والي " البلكونات " في جسمها ممتده .. مع خصر نحيف .. ويقولها شوفي جسمها متناسق
هي طبعا ما عجبها الكلام والتكرار فيه ..
افحتالت عليه مره وانتظرته قبل لا يجي من دوامه ..
وطلعت ملابس السهره مالتها وبعثرتها شي علي السرير وشي علي الارض
مع قطع الاسفنج الي تنحط تحت الفستان طبعا !!!
والي تعمدت تبرزها قدامه عي الارض ..

ولما وصل زوجها لقي الملابس مبعثره .. وهي مسويه نفسها نايمه .. فقالها فلانه
قومي شنو هالفوضي .. ؟؟؟؟؟
قالتله ان فلانه " زوجه اخوه " عندها عرس الليله واخذت مني فستان
والله يهديها بعثرة الفساتين في الغرفه .. الزوج طبعا شاف الاسفنج علي الارض فقالها هذا شنو ؟؟؟
قالت بخبث :
يووووووووه .. الله يخزي ابليسها خلته وراحت ..
فقالها اقولج شنو هذا ؟؟
قالتله .. هذا تحطه فلانه تحت هدومها علشان يبرز جسمها .. وكل الحريم يستخدمونه
الرجال قرب يلطم ..
قالها يعني جسمها هذا كله " حشوات " قالت ايه شنو علي بالك
ومن يومها سكت الرجال ولا عاد جاب سيرتها ..
مع ان جسمها حلو ومخصر بس من بيصدقها ؟؟؟؟

المشكله الي تارقني ان كل الحريم تساوت في الاشكال ..
عمليات التجميل وصلت الي العظم وصاروا ينحتونه علشان يصغرون الهيكل العريض
الشعر موصل ومثبت بعنايه ولا يمكن يطيح لو يشدونه بحبال ...

عمل حشوات تنحط تحت الفستان مع شد للخصر .. يخليه مثل الكمنجه ..

المشكله هنيه .. منو بيصدقني اذا طلعت في الحفلات بجسمي الرشيق
وشعري الطبيعي .. وطولي الحقيقي ..!!
كنت دائما اتباهي برشاقتي .. وبشكلي الطبيعي وانه كل " جمال رباني "
خالي من عمليات النصب ...
لدرجه ان في بنت " صايعه " من بنات افكاري .........
سولت لي فكره وهي اني البس " شفتشي " ..لو لزم الامر
والله قهر .. ناس هايصه وناس لايصه ؟؟
زمان كنا نقول " الزين عندنا والشين حوالينا "
لكن الي اشوفه اليوم ان هالجمله بتنحط في الارشيف .. وبتصير من عبق الماضي

تعتقدون : 
لو زوجه اخو صاحبنا هذاك اكتشفت حيله حماتها
شنو باعتقادكم بتسوي علشان تثبت ان هذا " لحمها مو حشوه "
وكم غالون من القهر والاحباط .. بتشيله المسكينه ساعتها ..

اتمني اشوف حلولكم لهالموضوع علي وعسي نلقي شي يخفف علينا القهر ..
تقبلوا تحياتي


ــــــــــــــــــــــــــ:
تعلم التدوين .......وانثر كنانتك

الاثنين، 8 أغسطس، 2011

بالله عليكم ..دراسه الهندسه .. ولا طبخ الذبايح بالمطبخ ؟؟

مساكم الله بالخير

بنت وحده من قريباتي تدرس بالثانويه العامه  ونجحت بنسبه 89% علمي .. البنت ماشاء الله عليها طموحها ماله حدود

يعني عرفت انها حابه تدرس هندسه او اداره اعمال ..لكن ابواب تفكيرها بهالاشياء تتقفل كل ما تذكرت المحضورات والمعوقات

وهي ببساطه شديده سي السيد ابوها الي معارض دخولها الجامعه علي ابو اختلاط  وو والي اخر المسميات

المشكله ان ابوها طالع وشايف ومعاشر ناس من طقه الفئه الي تدرس بالجامعات  يعني الوضع مو جديد عليه

لكن مو عارفه شنو الكيمياء الي في مخه وتفكيره الي اصدت هالقرار الجائر بحق بنته ..!!

ياااااا مسلمين ......   يا معشر 60% من شعب الكويت .. الي متي بس علي هالحال ؟؟؟

فهموني شنو الي تبونه من الحريم بالضبط حتي دراستها ما لها حق تختار فيها الي تبي تدرسه  ؟؟

كلمه والثانيه قلتوا عاداتنا  .. تقاليدنا ... العيب .. الحيا .. الـ.. الـ ..  الكلمات الي ودي اكفخه علي عينه الي بيقولها جدامي

واحنا في الماضي كنا  نتغافل  ونقول يمكن .. معاهم حق  .. يمكن اهمه شايفين شي احنا مو شايفينه ..

لكن كل شي وصل حده ... والحمد لله الي سكتنا بالبدايه علشان لما نحب نقوم عليهم " بالكلام طبعا " نقوم قومه امرأة واحده

نسمي بالله ..ونبلش بالاختلاط .... اقول لابو  صاحبتنا المهندسه لاحقا ان شاء الله " غصبن عنك وعن العادات "

اذا كنت خايف عليها من الجنس الاخر  .. فيستحن انك تقفل عليها بالبيت وبلاش دراسه ووجع راس ووفر علي الحكومه مؤونه

دراستها ... لانك لو ما سويت جذي فالبنت اساسا بتختلط بالجنس الاخر رضيت ولا ارضَيت .. ليش انا ما اشوفهم هالبنات

بالسوق تضحك مع هذا .. وتكاسر هذاك البياع وبصوت يسمعه الي بالمجمع الثاني ..بالمستوصف .. بالدوائر الحكوميه

كل مكان فيه اختلاط حتي  بالعمره  والحج اختلاط  اهي وقفت علي الجامعه ؟؟

سبحان الله  ..والله  مو عارفة  ليش التذبذب هذا الي عايشين فيه وشلون قادرين تتحملونه ؟؟

يعنوا كل تقليعه او مظهر جديد من مظاهر الحياه الا ما توقفون عليه مبلمين .. ومن  يقرب منكم  تبتدون  تصيحون وتنوحون

علي تقاليدكم  والمشكله احيانا علي اشياء تافهه .. ابي اعرف متي بتظرب الفيزياء اطنابها معاكم  وتتكيفون مع عالمكم الجديد ؟؟

تصدقون ان كلمه عادتنا وتقاليدنا .. خلتني " ارحمهم " وادور علي ماضينا البعيد جدا ..

لما دورت اثناء قراءاتي وكلامي مع  بعض كبار السن عن عادات ابناء الصحراء لقيت نفي قاطع لكل ما نسب اليهم  وتجني عليهم

من احفادهم .. المراه زمان اول هايته بالصحراء تطلع من شروق الشمس الي المغيب ترعي الغنم والابل .. واحيانا تروح علي مسيره

نص يوم عند معاطن الابل وتنام هناك ليله او ليلتين .. وبعدين تصدر بالابل وترد لاهلها .. المره كانت تجير من يستجير فيها

ويدخل بيتها بقصد الحمايه .. المراه اليوم لو تنقذ واحد في الشارع يبي نجدتها كان قاموا اهلها

ونصبوا لها المشانق " وكأنه مو من عاداتهم الي يتباكون عليها  "... المراه كانت تستقبل الضيف ايا كان لو دخل بيتها وطلب القري

المراه كانت تتكلم بجد او هزل " غشمره " مع ابناء قبيلتها شباب وبنات خصوصا مع اجتماعهم  علي بئر الماي مو اليوم الحرمه

ما تقدر تتكلم مع حماها زوج اختها او اخو زوجها ..يمكن اخو الزوج احيانا مسموح لزوجه الاخ انها تتكلم معاه لانه من ناحيه

 حضرت الزوج في حين ان  المذكور سابقا ... ما يرضي لاخته تتكلم مع زوج اختها ..

 اكتفي بهذا القدر من عادات قبلييي الصحراء وفضائلهم ..ولي هنيه ما لي اي تعليق

 اكتفي  بذكرها واتحسر علي واقع مخجل يرفض اصحابه واقعهم ..